Asas ajenga madarasa mawili shule ya Msingi Magegele

Tarehe iliyowekwa: July 15th, 2022

Na. Lina Sanga

Asas  mjumbe wa NEC wa chama cha Mapinduzi Mkoa wa iringa amejenga madarasa mawili katika shule ya msingi Magegele ili kupunguza msongamano wa wanafunzi darasani.

Kauli hiyo imetolewa na Mbunge wa Jimbo la Makambako,Mhe. Deo Kasenyenda Sanga leo wakati wa ziara ya ukaguzi wa madarasa hayo katika shule hiyo.

Amesema kuwa ujenzi wa madarasa ni moja ya kipaumbele chake hata kabla ya kuwa diwani na Mbunge wa Jimbo la Makambako,hivyo baada ya kupokea taarifa za idadi ya wanafunzi katika shule hiyo na idadi ya madarasa yaliyopo ilimemlazimu kufanya jitihada za kumtafuta Asas ili aweze kusaidia katika ujenzi wa madarasa.

         Madasara mawili yaliyojengwa na Asas

"Awali nilipoongea na Asas alisema atajenga darasa moja lakini nilimshawishi kutujengea madarasa mawili na alikubali na ndiyo haya madarasa tunayoyaona leo ambayo yapo katika hatua ya ukamilishaji,ili watoto wetu wasome vizuri",alisema Mhe  Sanga.

Ameongeza kuwa katika shule ya Msingi Magegele, jumla ya madarasa manne, ofisi moja na choo cha walimu amejenga yeye tangu shule hiyo inaanza mwaka 2014 hadi sasa na bado ataendelea kujenga madarasa kwani ni utamaduni wake.

Naye Mkurugenzi wa Halmashauri ya Mji Makambako,Kenneth Haule ametoa shukurani za dhati kwa Mbunge wa Jimbo la Makambako kwa jitihada mbalimbali anazozifanya za kuhakikisha Mji wa Makambako unajengeka,lakini pia kuwarahisishia watendaji wote wa Halmashauri ya Mji Makambako kwa kupokea maombi mbalimbali yanayohitaji utekelezaji ngazi za juu kwa haraka na kuhakikisha yanatekelezwa.

    Mkurugenzi wa Halmashauri ya Mji Makambako, Bw. Kenneth K. Haule

Aidha,Haule ametoa shukurani kwa Asas kwa ujenzi wa madarasa mawili katika shule ya Msingi magegele kwani shule hiyo yenye jumla ya wanafunxi 1,883 inakabiliwa na msongamano mkubwa wa wanafunzi madarasani.

Ujenzi wa madarasa hayo  mawili umegharimu jumla ya Shilingi mil 17.05 na kwa sasa ujenzi upo katika hatua ya ukamilishaji.