CHADEMA tawi la Magegele wampongeza Mama Samia Suluhu Hassan wasema anaupiga mwingi

Tarehe iliyowekwa: July 22nd, 2022

Na. Lina Sanga

Wanachama wa Chama cha Demokrasia na Maendeleo (CHADEMA),tawi la Magegele wampongeza mama samia kwa kuupiga mwingi kwenye miradi ya maendeleo inayofanyika nchini na kuunganisha vyama vya siasa nchini.

Kauli hiyo imetolewa leo na Katibu Mwenezi wa CHADEMA tawi la Magegele,Braiveth Kiwovele katika mkutano wa hadhara wa Mbunge wa jimbo la Makambako,Mhe. Deo Kasenyenda Sanga uliofanyika katika ofisi ya Mtaa wa Magegele.

Kiwovele amesema kuwa wanampongeza Mhe. Samia Suluhu Hassan,Rais wa Jamhuri ya Muungano wa Tanzania kwani tangu aingie madarakani amefanya mambo makubwa ikiwa ni pamoja na kuunganisha vyama vya siasa nchini.

Amesema kuwa watanzania waligawanyika makundi zaidi ya manne lakini Mama Samia amerekebisha na sasa watanzania wote wanakaa pamoja,hivyo CHADEMA tawi la Magegele wanampongeza kwani kazi ya kuunganisha vyama vya siasa sio kazi rahisi.

Ametoa rai kwa Mbunge wa jimbo la Makambako kufikisha salamu hizo kwa Mhe. Samia Suluhu Hassan na wanamuombea mafanikio katika kazi zake lakini wanaomba suala la Katiba mpya lipewe uzito mkubwa ili waendelee kumpongeza zaidi.

Ziara ya Mbunge inaendelea katika Kata,Mitaa na Vijiji vyote vilivyopo katika Halmashauri ya Mji Makambako kwa ajili ya kuzungumza na  wananchi,kusikiliza kero zao pamoja na kutoa jumbe mbalimbali za Serikali kama bajeti ya mwaka 2022/2023,Sensa ya watu na Makazi,Mbolea ya ruzuku na chanjo ya Uviko 19.

Katika bajeti ya Serikali ya Mwaka 2022 Halmashauri ya Mji Makambako imepata jumla ya shilingi Bil. 42 kwa ajili ya Mradi wa Maji,Fedha kwa ajili ya miundombinu ya shule na Afya.