DC Sweda asisitiza zoezi la uhamisho wa muda wa wafanyabiashara wa Soko kuu na Stendi ya zamani kuwa shirikishi.

Tarehe iliyowekwa: February 20th, 2025

Na. Tanessa Lyimo

Mkuu wa Wilaya ya Njombe,Mhe. Juma Sweda ameutaka uongozi wa  Halmashauri ya Mji Makambako kushirikiana na wafanyabiashara wa Soko kuu na  Stendi ya zamani, katika harakati za kuwahamishia kwa muda wafanyabiashara hao katika eneo  la kuoshea magari mkabala na A one lodge,  lililopo katika Mtaa wa Kahawa, Kata ya  Kitisi  ili kupisha ujenzi wa Soko la kisasa unaotarajiwa kuanza mwaka ujao wa fedha 2025/2026,kupitia mradi wa uboreshaji miji wa TACTIC.

Mhe. Sweda ametoa rai hiyo leo katika Mkutano wa hadhara na wafanyabiashara wa Soko kuu na Stendi  ya zamani , na kumuagiza Mkurugenzi wa Halmashauri ya Mji Makambako, kuzingatia suala la Miundombinu wakati wa ujenzi wa soko hilo hasa miundombinu ya vyoo.

Aidha,ameuagiza uongozi wa  Halmashauri kupitia divisheni ya Biashara,Viwanda na Uwekezaji kuendelea kuboresha mazingira ya wafanyabiashara kwa  kutekeleza majukumu yao, ili kusaidia kuongeza mapato na kuleta taswira nzuri ya uwekezaji katika Mji wa Makambako.

Wakati huo huo, Mbunge wa jimbo la Makambako, Mhe. Deo Kasenyenda Sanga amemkaribisha  Mhe. Sweda katika jimbo la Makambako baada ya kufanyika kwa mabadiliko ya wakuu wa Wilaya na kumshukuru Dkt.Samia Suluhu Hassan ,kwa kutambua umuhimu wa sekta ya Afya  kwa kutoa vifaa mbalimbali, ikiwa ni pamoja na  magari mawili ya kubebea wagonjwa aliyokabidhi leo.

Ndg. Kenneth Haule, Mkurugenzi wa Halmashauri ya Mji Makambako , amewataka wananchi kupuuza taarifa za upotoshaji kuhusu  eneo la muda lililotengwa kwa matumizi ya soko wakati wa ujenzi wa soko jipya, na kuwahakikishia kuwa kila mfanyabiashara  anayetambulika na uongozi wa soko hilo atapata nafasi ya kufanya biashara bila kubaguliwa wala  kusumbuliwa katika eneo hilo.

Naye, Mwenyekiti wa Jumuiya ya wafanyabiashara Mkoa wa Njombe na Nyanda za juu Kusini,Ndg. Sifael Msigala amemshukuru Mkurugenzi kwa ushirikiano baina ya wafanyabiashara na watendaji wa Serikali, katika mchakato mzima wa maandalizi ya awali katika mageuzi ya soko hilo na katika masuala mbalimbali yanayohusu maendeleo na changamoto zinazowakabili wafanyabiashara.