Hatuna katazo lolote la kutupa takataka kwenye dampo la Itengelo.

Tarehe iliyowekwa: November 7th, 2023

Na. Lina Sanga

Kauli hiyo imetolewa leo  na Mwenyekiti wa Halmashauri ya Mji Makambako, Mhe. Hanana Mfikwa katika mkutano wa  baraza la Madiwani la robo ya kwanza katika  mwaka wa fedha 2023/2024.

Mhe. Hanana ametoa kauli hiyo mara baada ya mjumbe wa baraza hilo kuhoji namna gani Halmashauri ya Mji Makambako imejipanga kupata eneo la kutupa taka, mara baada ya baraza la Madiwani wa  Halmashauri ya Wilaya ya Wanging'ombe kutoa tamko la kupinga  matumizi ya dampo la Itengelo,lililopo Kata ya Saja kupitia vyombo vya habari.

Mhe. Hanana amesema kuwa, Halmashauri haifanyii kazi vyombo vya habari bali vikao, na vyombo vya habari vinatoa taarifa za vikao na Halmashauri ya Mji Makambako haina katazo lolote la kutupa takataka kwenye dampo la Itengelo bali ruhusa ya kutupa taka kwenye eneo hilo  na Halmashauri ya Wilaya ya Wanging'ombe ambao ndiyo wenye eneo wanajua na wana barua yenye ruhusa  inayowataka kuipa   Halmashauri ya Mji Makambako ushirikiano kuhusu  kutupa taka kwenye eneo hilo.

" Sisi kama Halmashauri hatuna katazo lolote la kutupa takataka kwenye eneo lile bali tuna ruhusa ya kutupa takataka kwenye eneo lile na linafaa kutupa takataka,  na wao wenye eneo hilo wanajua na wana barua inayoturuhusu sisi na inayowataka wao kutupa ushirikiano sisi kuhusu kutupa  taka kwenye eneo lile kwa hiyo hii ndiyo taarifa na ndiyo habari", alisema Mhe. Hanana.

Aidha, amesema kuwa wakati muafaka utakapofika wa kuwa na eneo mbadala kwa kadri ya mahitaji,zoezi la kutenga maeneo kwa ajili ya shughuli mbalimbali ikiwa ni pamoja na eneo la kutupa taka linafanyiwa kazi na watendaji kama ambavyo maandalizi mengine yanavyofanyika  kama ujenzi wa madarasa, nyumba,barabara na miundombinu mingine.