KWA MARA YA KWANZA WAKAZI WA MTAA WA KILIMAHEWA WANUFAIKA NA FEDHA ZA MPANGO WA KUNUSURU KAYA MASIKINI-TASAF

Tarehe iliyowekwa: January 7th, 2022

Wakazi 34 wa Mtaa wa Kilimahewa katika Kata ya Majengo ,wamenufaika na Fedha za Mpango wa Kunusuru Kaya Masikini kwa mara ya kwanza leo,tangu Mpango huo kuanzishwa Nchini ili waweze kujikwamua na wimbi la Umasikini.

Akizungumza na walengwa wa Mpango huo,Mratibu wa TASAF Mkoa wa Njombe, Bw. Mussa Selemani amewataka walengwa wote wa awamu ya tatu katika Mtaa wa Kilimahewa,kuzingatia matumizi sahihi ya fedha walizopewa,kwani ufuatiliaji utafanyika ili kuhakikisha kama fedha hizo zinatumika kwa malengo yaliyokusudiwa,ili baada ya miaka mitatu kila mlengwa awe na mabadiliko kuitwa masikini haipendezi.

“Ukishikwa nawe jitaidi kujikwamua,kwani umasikini ni kama kina kirefu cha maji,Serikali inapokupa fedha inakusaidia kujikwamua usizame kwenye umasikini,hivyo ni wajibu wa kila mlengwa kuhakikisha fedha hizo anatumia katika kuanzisha miradi na uhakiki utafanyika kila wakati wa malipo ili kutambua kama fedha alizopewa ametumia ipasavyo,endapo asipofikia lengo atatolewa kwenye orodha ya walengwa na kuwapa nafasi wengine waliokosa katika awamu hii ya tatu ya TASAF,” alisema Mussa.

Bw. Mussa amesema kuwa kiashiria cha Mlengwa wa TASAF kunufaika kwa fedha alizopewa ni pamoja na mabadiliko ya muonekano wake katika mavazi,hatarajii kumuona Mlengwa amevaa nguo imechanika ama anatembea bila viatu.

Naye Mratibu wa TASAF katika halmashauri ya Mji Makambako,Bi. Neema Chaula ametoa wito kwa walengwa wote wa TASAF kujitokeza kusaini baada ya Malipo,na kuanzisha miradi endelevu kama ufugaji kuku ili kuboresha maisha yao na familia zao, badala ya kunywea pombe na mambo mengine kama hayo.

Patrick Kyalawa ambaye ni Mwezeshaji,amewataka walengwa hao kuhakikisha fedha hizo zinaacha alama katika maisha yao na jamii inayowazunguka,endapo hata TASAF isipokuwepo basi alama ya kuwakwamua wananchi kutoka wimbi la umasikini ionekane.

“Fedha hizi ziwasaidie kupiga hatua katika maisha yenu,na ili uweze kupiga hatua ni lazima uweke malengo endelevu ili uweze kupata kipato endelevu uwasomeshe watoto,ujenge nyumba bora,kwani kuishi maisha duni na kuvaa mavazi chakavu,si kigezo cha kuwa Mlengwa wa TASAF,milele kwani walengwa  hubadilika hakuna walengwa wa kudumu”, alisema Kyalawa.

MWISHO