Maelezo ya uchaguzi yatolewa, viongozi wa kisiasa na Kidini watoa neno kuelekea novemba 27,2024.

Tarehe iliyowekwa: September 26th, 2024

Na. Lina Sanga

Viongozi wa kisiasa katika Halmashauri ya Mji Makambako wameahidi kutoa elimu ya kujiandikisha kwa  wananchi ili waweze  kushiriki uchaguzi wa Serikali za Mitaa novemba 27,2024.

Viongozi hao wametoa kauli hiyo leo katika kikao cha msimamizi wa uchaguzi wa Halmashauri ya Mji Makambako cha kutoa maelezo ya uchaguzi,kilichofanyika katika ukumbi wa Halmashauri ya Mji Makambako na kuhudhuriwa na wadau mbalimbali wa uchaguzi ikiwa ni pamoja na viongozi wa vyama vya kisiasa,viongozi wa kidini, wawakilishi wa wafanyabiashara , madereva bodaboda na bajaji.

Katibu wa siasa,mafunzo na uenezi chama cha mapinduzi wilaya ya Njombe,  Ndg. Hitra Msola na Mwenyekiti wa Chama Cha Demokrasia na Maendeleo (CHADEMA) Wilaya ya Njombe, Ndg. Seth Vegula na kiongozi wa ngome ya wazee wa chama cha ACT Wazalendo, Ndg. Mtemi Mtinange wamesema watahakikisha wanatoa elimu kwa wananchi  kujiandikisha  kwenye daftari la wapiga kura ili wapate nafasi ya kuchagua viongozi wanaowataka katika Mitaa,Vijiji na Vitongoji vyao.

Awali akitoa maelezo ya uchaguzi Msimamizi wa uchaguzi wa Halmashauri ya Mji  Makambako Ndg. Kenneth Haule amesema kuwa,Halmashauri ya mji wa Makambako imetenga vituo 121 kwaajili ya wananchi wenye sifa ya kushiriki uchaguzi huo kwa kujiorodhesha kwenye daftari la wapiga kura  kuanzia oktoba 11 hadi 20 2024 ili waweze kuchagua viongozi wa Mitaa,Vijiji au Vitongoji wanavyoishi badala ya maeneo ambayo wanafanyia shughuli za kiuchumi.

Nao viongozi wa kidini Askofu Abednego Ulambale na Shekhe Ibrahim Chang'a , wametoa rai kwa viongozi wa kisiasa na wasimamizi wa uchaguzi kutanguliza  maslahi ya Taifa mbele kwa kusimamia haki na kutumia maneno ya kudumisha amani badala ya kuhamasisha uvunjivu wa amani.

Kauli mbiu ya uchaguzi wa Serikali za Mitaa 2024 inasema "Serikali za Mitaa, Sauti ya Wananchi Jitokeze kushiriki uchaguzi".