Mkuu wa Wilaya ya Njombe,Mhe. Kissa Gwakisa Kasongwa akabidhi Pikipiki 28 kwa Maafisa Ugani na Ushirika leo

Tarehe iliyowekwa: June 14th, 2022

Na. Lina Sanga

Mkuu wa wa Wilaya ya Njombe,Mhe. Kissa Gwakisa Kasongwa leo amewakabidhi Maafisa Ugani na Ushirika wa halmashauri ya Mji Makambako pikipiki 28 na amewataka Maafisa hao  kuzitunza pikipiki walizokabidhiwa,ili ziweze kudumu kwa muda mrefu kwa  kuzitumia kwa kazi iliyokusudiwa badala ya kubebea nyasi za ng’ombe,Mkaa na Mizigo mingine kuliko uwezo wa pikipiki hizo.

Mhe. Kasongwa ametoa wito huo wakati wa zoezi la ugawaji wa pikipiki hizo zilizotolewa na Rais wa Jamhuri ya Muungano wa Tanzania,Mhe. Samia Suluhu Hassan kwa Maafisa Ugani wa Mikoa kumi Nchini  ili kuwawezesha maafisa hao kuwafikia wakulima kwa urahisi.

Aidha Mhe. Kasongwa  amesema kuwa  Mhe. Samia Suluhu Hassan kwa sasa ametoa pikipiki hizo kwa mikoa kumi ya mwanzo,ikiwa ni mikoa ambayo inatekeleza shughuli  za  kilimo na kuzalisha chakula kwa ajili ya Nchi yetu,hivyo baada ya kuwezeshwa pikipiki hizo ni matarajio ya Serikali kuona matokeo makubwa katika utendaji kazi wa maafisa Ugani.

 “Mhe. Samia Suluhu Hassan anasema kazi iendelee hivyo kupitia uwezeshwaji huu wa pikipiki 28 tunaamini kazi itaendelea zaidi,kwa kupata matokeo makubwa katika sekta ya kilimo kwa kuona utofauti wa kabla ya kupewa pikipiki na baada ya kupewa pikipiki hizi,hivyo mnatakiwa kujiwekea malengo ya kabla ya kuwa na pikipiki hali ilikuaje na baada ya kupewa pikipiki”,amesema Mhe. Kasongwa.

Pia ameipongeza halmashauri ya Mji  Makambako kwa kuitikia wito wa Rais wa Jamhuri ya Muungano wa Tanzania,Mhe. Samia Suluhu Hassan  na Waziri Mkuu, Mhe. Kassim Majaliwa kuhusu ugawaji wa pikipiki hizo kwa Maafisa Ugani,na halmashauri ya Mji Makambako imetekeleza ugawaji wa pikipiki hizo  zikiwa na usajili wa awali ili zianze kazi na mengine yataendelea kukamilishwa kwenye maeneo yao kazi.

Akitoa shukrani kwa niaba ya Maafisa Ugani wote,Bw.Patrick Kyalawa ambaye ni Afisa Kilimo wa Kijiji cha Mkolango ametoa shukrani kwa Rais wa Jamhuri ya Muungano wa Tanzania,Mhe. Samia Suluhu Hassan  kwa kuwajali  na kuwapa pikipiki hizo ambazo  zitawasaidia kuwafikia wakulima kwa wakati,na kuleta matokeo makubwa tofauti na mwanzo kwani awali ilikuwa ngumu kuwafikia  wakulima kwa wakati,kwani vituo vya kazi vipo maeneo tofauti maeneo mengine kuna  milima na mabonde na kuwafikia wakulima kwa haraka ilikuwa ngumu,lakini kwa sasa wataweza kuwafikia wakulima kwa wakati na kutatua changamoto kwa haraka na kuleta mabadiliko makubwa  kupitia idara ya Kilimo.

Naye Afisa Usafirishaji wa halmashauri ya Mji Makambako,Bw. David Mbunda ametoa rai kwa Maafisa ugani wote waliokabidhiwa Pikipiki hizo kuzingatia sheria za barabarani na kuhakikisha wanapata leseni za udereva pamoja na kuhakikisha wanatunza pikipiki hizo na kuzitumia kwa matumizi yaliyokusudiwa na si vinginevyo.

Halmashauri ya Mji Makambako imepokea jumla ya pikipiki 28 ambapo pikipiki 27 ni kwa ajili ya Maafisa Ugani na pikipiki moja kwa ajili ya Afisa ushirika wa halmashauri ya Mji Makambako.