Taasisi za kukopesha fedha 'kausha damu" kusimamiwa na Halmashauri badala ya Benki Kuu ya Tanzania.

Tarehe iliyowekwa: April 9th, 2024

Na. Lina Sanga

Tamko hilo limetolewa leo na Bw. Agathon Kipandula,Meneja utawala na fedha wa Benki Kuu ya Tanzania kanda ya Mbeya,katika semina  kuhusu utaratibu wa minada ya dhamana za Serikali pamoja na faida zake iliyofanyika katika Ukumbi wa greencity na kuhudhuriwa na  baadhi ya wafanyabiashara na timu ya  menejimenti ya Halmashauri ya Mji Makambako.

Kipandula,ametoa tamko hilo baada ya Mwenyekiti wa jumuiya wa wafanyabiashara Mkoa wa Njombe, Sifael Msigala kuhoji usimamizi na udhibiti wa taasisi za kukopesha fedha maarufu kama Kausha damu,kutokana na adha mbalimbali wanazopitia wananchi baada ya kukopa kwenye taasisi hizo.

Kipandula amesema kuwa, jukumu moja wapo la benki kuu ya Tanzania ni kusimamia benki zote ikiwa ni pamoja na kausha damu,ila kutokana na sababu mbalimbali za kiutendaji kausha damu bado hazijafikiwa na benki kuu hivyo ili kurahisisha usimamizi na udhibiti wa ukiukwaji wa sheria za fedha jukumu hilo linakabidhiwa kwa Wakurugenzi wa Halmashauri husika.

Amewataka wananchi kutoa taarifa za kudhulumiwa na kausha damu kwa kuwa na ushahidi ,pamoja na fedha ambazo zilikuwa kwenye  kadi za simu zilizopotea   au  kuharibika na kutotumika tena   kupitia dawati la usuluhishi wa miamala la benki kuu ya Tanzania,ili warejeshewe fedha zao kwani miamala yote ya kifedha inasimamiwa na benki kuu na siyo TCRA kwani jukumu lake ni moja tu,la mawasiliano.

Amebainisha kuwa, hadi kufikia  leo aprili 9,2024 jumla ya bil. 40 zimepatikana kutoka kwenye kadi za simu zilizotupwa au kupotea na wamiliki kutofanya ufuatiliaji wa kurejeshewa fedha hizo.

Awali akifungua semina hiyo Mkurugenzi wa Halmashauri ya Mji Makambako,Kenneth Haule ameipongeza benki kuu ya Tanzania kwa kuandaa semina hiyo yenye manufaa kwa wananchi wote,ikiwa ni pamoja na watumishi wa Umma.