Viongozi wa Mtaa wa Sekondari anzisheni harambee ya ufunguaji barabara-Kenneth Haule Mkurugenzi wa Halmashauri ya Mji Makambako.

Tarehe iliyowekwa: August 17th, 2022

Na. Lina Sanga

Mkurugenzi wa Halmashauri ya Mji Makambako,Kenneth Haule ameuagiza uongozi wa mtaa wa Sekondari katika Kata ya Maguvani kufanya harambee ya kufungua barabara za mitaa ili urasimishaji uliofanyika uwe na tija.

Haule ametoa agizo hilo leo katika mkutano wa uzinduzi wa utoaji hatimiliki kwa wananchi wa mtaa wa Sekondari,uliofanyika Maguvani kijiweni.

Amesema kuwa,ili kuwe na tofauti kati ya Mtaa wa Sekondari uliofanyiwa urasimishaji na Mitaa mingine ambayo bado haijafikiwa na urasimishaji,lazima Mtaa huo uwe na barabara zilizopangika vizuri hivyo wananchi hawana budi kuanzisha ufunguzi wa barabara.

Pia,ametoa rai kwa wananchi kutunza mawe yaliyowekwa baada ya upimaji kwa kutambua kuwa jiwe hilo ni mali ya Serikali,hivyo kila mwananchi ana wajibu wa kulinda mawe hayo kwani endapo yakipotea anawajibu wa kutoa ripoti mapema kabla ya hatua kali za kisheria hazijachukulia dhidi yake.

“Jiwe lililopandwa kwenye kiwanja chako sio lako ni mali ya Serikali na endapo likipotea ni lako,hivyo umepewa dhamana ya kulitunza jiwe hilo na endapo likipotea toa ripoti kwa mamlaka husika haraka”,alisema Haule.

Ametoa wito kwa wananchi ambao wamepimiwa viwanja kukamilisha malipo ya kupata hati, kwani Halmashauri ya Mji Makambako ina jumla ya mitaa 54 na mitaa 23 haijafanyiwa urasimishaji,hivyo wananchi wanaomiliki ardhi Mtaa wa Sekondari na wameshapimiwa ardhi wana wajibu wa kuijengea heshima Halmashauri yote kwa kutambua thamani ya upendeleo wa kufikiwa na mradi wa MKURABITA katika Mtaa wao.