Wakurugenzi na Maafisa elimu wahudumieni walimu acheni kuwapa mamlaka masekretari kujibu kwa niaba yenu-RC Mtaka.

Tarehe iliyowekwa: September 12th, 2022

Na. Lina Sanga

Wakurugenzi na maafisa elimu wametakiwa kutowaruhusu watumishi walio chini yao,hususani masekretari kutoa majibu kwa niaba yao kwa watumishi na wananchi wanaofika kwenye ofisi zao kupata huduma hususani walimu,na endapo hawawezi kuwasikiliza walimu waache nafasi hizo ili wanaoweza kutoa huduma wapewe nafasi hizo.

Rai hiyo imetolewa na Mkuu wa Mkoa wa Njombe,Mhe. Anthony Mtaka leo alipokuwa anazungumza na walimu pamoja na wadau wa elimu katika kikao cha uzinduzi wa mwongozo wa elimu,kilichofanyika shule ya Sekondari Mpechi.

Mhe. Mtaka amesema kuwa,baadhi ya watumishi na  masekretari hutoa majibu kwa watumishi hususani walimu wanapofika katika ofisi ya Mkurugenzi au Afisa elimu,ili kupata huduma mbalimbali ikiwemo changamoto wanazokumbana nazo kwenye maeneo yao ya kazi na kuwazuia kuonana na Mkurugenzi au Afisa elimu.

"Natoa rai kwa wakurugenzi na Maafisa elimu kutowaruhusu wasaidizi wenu na masekretari wenu kuwajibu watumishi hususani walimu wanapofika ofisini kwenu kupata huduma,kwani nafasi hizo sio za kudumu pindi mtapohitaji huduma izo baada ya kustaafu mtajibiwa hivyo hivyo na masekretari wenu au kukutana na watumishi mnaowafanyia hayo wakiwa nafasi za juu kuliko nyinyi",amesema Mhe. Mtaka.

Pia ametoa wito kwa Walimu kufika katika ofisi ya Mkuu wa Mkoa wanapohitaji msaada au huduma mbalimbali  kwani ofisi hiyo ni yao na sio lazima watoe taarifa ya kufika ofisini hapo.