Wananchi watakiwa kulupa gharama za urasimishaji mapema kukamilisha zoezi kwa wakati

Tarehe iliyowekwa: May 27th, 2024

Na. Lina Sanga

Mkurugenzi wa Halmashauri ya Mji Makambako, Kenneth Haule amewataka wananchi kuchangia gharama za urasimishaji kwa wakati ili zoezi likamilike kwa wakati.

Haule ametoa wito huo leo katika mkutano wa uhamasishaji wa zoezi la urasimishaji katika Mtaa wa Igangidung'u katika Kata ya Kivavi na kuwataka wananchi wote kukamilisha malipo ya utambuzi,upangaji na  upimaji kwa kila kiwanja,ambapo kiwanja kimoja gharama yake ni  130,000.

Amesema kuwa, kutokana na gharama ya zoezi hilo kuwa ndogo ni vema wananchi wakachangia ndani ya muda mfupi,ili endapo miongozo ikibadilishwa kuhusu urasimishaji utekelezaji  uwe unaendelea.

Flaviana Mamkwe, Msimamizi wa sekta ya ardhi katika Halmashauri ya Mji Makambako amesema kuwa, Mtaa wa Igangidung'u unakadiriwa kuwa na viwanja 860 ambavyo vitarasimishwa na kila mwananchi atafikiwa kupitia kamati ya urasimishaji ya Mtaa itayopendekezwa na wananchi.

Naye Charles Komba,Mpima ardhi katika Halmashauri ya Mji Makambako ,amewataka wananchi kutounganisha viwanja kwa kukwepa kulipa gharama ya urasimishaji kwa kila kiwanja, kwani hati  itasoma kiwanja kimoja na kugawanyisha tena ni gharama .

Wananchi wa mtaa wa Igangidung'u wameunda kamati ya urasimishaji na kupendekeza juni 30,2024 kila mmoja akamilishe zoezi la uchangiaji wa gharama za urasimishaji 130,000 kwa kiwanja.