Wataalamu na viongozi watakiwa kusimamia upatikanaji na utoaji wa huduma za chanjo.

Tarehe iliyowekwa: April 25th, 2025

Na. Tanessa Lyimo

Viongozi na wataalam wametakiwa kuimarisha na kusimamia upatikanaji wa huduma za chanjo katika maeneo yao ya kiutawala,na kuhakikisha kuwa kila mwananchi anapatiwa huduma ya Chanjo ili kuendeleza mapambano dhidi ya  vifo vinavyosababishwa na ukosefu wa huduma hiyo.

Wito huo umetolewa leo na Mhe. Nolasko Mlowe Mwenyekiti wa Kamati ya uchumi, elimu na afya, diwani wa Kata ya Mjimwema ambaye alikuwa mgeni rasmi katika uzinduzi wa wiki ya chanjo  na maadhimisho ya siku ya Malaria duniani,ambapo Kimkoa uzinduzi huo umefanyika katika viwanja vya kituo cha Afya Makambako.

Kaimu Mganga mkuu wa Mkoa wa Njombe, Dkt.Robert Maselle  amesema kuwa, Mkoa wa Njombe umefanikiwa  kusimamia  utoaji wa huduma za chanjo kwenye Halmashauri zote,   ambapo jumla ya vituo 361 vinavyotoa huduma za afya vituo 301 vinatoa huduma ya chanjo.

Dkt. Maselle amebainisha kuwa  kwa mwaka 2024,utoaji wa chanjo katika  Mkoa wa Njombe  ilikuwa ni asilimia 89 kati ya lengo lililowekwa  na kutoa wito kwa wazazi na walezi kuwapeleka watoto kupata chanjo kwa  wakati sahihi, na kuhakikisha kila mtoto anapatiwa chanjo ili kuzuia mlipuko wa magonjwa yanayozuilika kwa chanjo katika jamii.

Jumla ya watoto 165 wenye umri  chini ya miaka 5 katika Halmashauri ya Mji  Makambako, wanatarajia kupata huduma ya chanjo hadi Aprili 30,2025.