Wazazi na walezi ni kikwazo cha watoto kujiunga MEMKWA

Tarehe iliyowekwa: September 8th, 2022

Na. Lina Sanga

Uelewa mdogo wa wazazi na walezi kuhusu umuhimu wa elimu kupitia Mpango wa Elimu  ya Msingi  Kwa Waliokosa (MEMKWA),ni kikwazo kikubwa cha watoto waliokosa elimu kwa mfumo rasmi kujiunga na MEMKWA.

Hayo yameelezwa na mwalimu wa MEMKWA shule ya Msingi Juhudi,Mwl Rose Mhema katika maadhimisho ya wiki la elimu ya watu wazima,yaliyofanyika  leo katika viwanja vya shule ya msingi Kahawa katika Halmashauri ya Mji Makambako.

Mwl.Mhema amebainisha kuwa kutokana na mwamko hasi wa wazazi na walezi juu ya kuwasomesha watoto walikosa elimu kwa mfumo rasmi kujiunga na MEMKWA, imepelekea watoto kufanya maamuzi ya kujiandikisha bila ridhaa ya wazazi na kukosa vifaa vya kujifunzia.

“Mtoto mwenye miaka kumi ambaye  amekosa elimu kwa mfumo rasmi,wazazi hawaoni umuhimu wa kuwaandikisha elimu ya MEMKWA hali inayosababisha watoto kujileta shuleni wenyewe,wanapofika shuleni walimu wanawapokea lakini wanakabiliwa na changamoto ya kukosa vifaa vya kujifunzia,kutokana na wazazi kutoona umuhimu wa kuwasomesha watoto wao,hivyo walimu wanalazimika kuwanunulia vifaa ili kuwasaidia kuanza masomo yao”,alisema Mwl. Mhema.

Aidha amesema kuwa,licha ya mwamko hasi wa wazazi na walezi kumekuwa na mafanikio makubwa kupitia MEMKWA, kwani idadi ya watoto wasio  jua  kusoma na kuandika imepungua,na wanafunzi wengi wamefanikiwa kujiunga na masomo ya sekondari hadi vyuo.

Ametoa wito kwa Serikali kupitia ofisi ya Mkurugenzi kuwapunguzia majukumu walimu wa MEMKWA,kwani wana kazi nyingi tofauti na walimu wa elimu rasmi.

Mpango wa Elimu  ya Msingi  Kwa Waliokosa (MEMKWA) ulianzishwa rasmi mwaka 2003,kwa lengo la kuwawezesha watoto wote kuanzia miaka tisa hadi kumi na nane  ambao hawakupata nafasi ya kujiunga darasa la kwanza katika mfumo rasmi kutokana na changamoto mbalimbali kupata elimu.

Halmashauri ya Mji makambako ina jumla ya vituo kumi vya MEMKWA, ambavyo ni shule ya msingi Lyamkena,Makambako,Kifumbe,Juhudi,Ikwete, Mtanga,Majengo,Kilimahewa,Magegele na Mludza.