Waziri wa Nchi,ofisi ya Rais Menejimenti ya Utumishi wa Umma na Utawala Bora, Mhe. Jenista Mhagama aipongeza TASAF Halmashauri ya Mji Makambako kwa utekelezaji wa miradi na maagizo ya Rais.  

Tarehe iliyowekwa: November 15th, 2022

Na. Lina Sanga

Waziri wa Nchi,ofisi ya Rais Menejimenti ya Utumishi wa Umma na Utawala Bora, Mhe. Jenista Mhagama ameipongeza halmashauri ya mji makambako kwa kufikia asilimia 95 ya kufanya malipo kwa kutumia mifumo ya malipo ya fedha ya Serikali kwa wanufaika wa TASAF pamoja na Ujenzi wa miradi wenye viwango.

Mhe. Jenista ametoa pongezi hizo leo katika kijiji cha Ikelu, kata ya Utengule alipofanya ziara ya ukaguzi wa miradi ya ujenzi wa zahanati ya kijiji cha ikelu na ujenzi wa nyumba pacha za watumishi wa kituo hicho iliyojengwa   kwa fedha za Tasaf.

Amesema kuwa malipo ya fedha kupitia mifumo ya Serikali ni maelekezo ya mheshimiwa Rais,ili kuhakikisha usalama wa matumizi ya fedha za Serikali na wanufaika wote kupata fedha kwa wakati.

Ameiagiza TASAF makao makuu kuhakikisha wanaongeza juhudi na kuimarisha  mifumo yake pamoja na kusimamia zoezi la malipo ya fedha kwenda kwa walengwa kitaifa  linafanyika,ili kiwango cha utekelezaji kiongezeke kutoka  asilimia ishirini zilizopo sasa  na walengwa wapate fedha zao kwa wakati na usalama.

Pia,ametoa wito kwa Mkurugenzi wa Halmashauri ya Mji Makambako kuhakikisha mikopo ya asilimia kumi inayotolewa kwa vijana,wanawake na watu wenye ulemavu zinawafikia  walengwa wa TASAF kupitia  vikundi vyao vya maendeleo vya TASAF, pamoja na kuwatambua watoto wanaotoka kaya masikini wanaohitimu elimu ya msingi na Sekondari na kushindwa kuendelea na masomo ya vyuo ili kuwapatia nafasi ya kujiunga vyuo vya kati (VETA) kwa  kusomeshwa bure na Serikali.

Aidha,amewapongeza wananchi wa Kata ya Utengule kwa uzalendo wa kuchangia  zaidi ya Mil 16. 7 kwa ajili ya ujenzi wa jengo la wagonjwa wa nje na nyumba ya  watumishi,na kuwata wananchi wote nchini kuunga mkono juhudi za Serikali kwa kuchangia shughuli za maendeleo katika maeneo yao.

Ametoa  wito kwa kaya masikini ambazo zinanufaika na TASAF kutumia fedha wanazopata vizuri na kuzalisha,kwani matarajio ya Serikali ni kuziwezesha kaya hizo kuweza kusimama vizuri na kuweza kujitegemea ili Serikali ipate nafasi ya kuzisaidia kaya nyingine.