Zingatieni ubora kabla ya kupitisha malipo - Kenneth Haule,Mkurugenzi wa Halmashauri ya Mji Makambako.

Tarehe iliyowekwa: March 31st, 2024

Na. Lina Sanga

Kenneth Haule,Mkurugenzi wa Halmashauri ya Mji Makambako ,jana machi 30,2024 alifanya ziara na kukagua utekelezaji wa miradi ya TASAF katika kijiji cha Usetule,Ibatu,Mtaa wa Ubena,Mtaa wa Ikwete na Kijiji cha Ngamanga.

Katika ziara hiyo,Haule aliwaagiza kamati za Vijiji na Mitaa zinazosimamia miradi hiyo, kuhakikisha wanasimamia vizuri miradi hiyo kuanzia ununuzi wa vifaa,mapokezi na malipo ya fundi kwa kutoridhia malipo endapo vifaa havina ubora au fundi kujenga chini ya kiwango hadi marekebisho yatakapofanyika.

Aidha,amezipongeza Kamati hizo pamoja na wananchi kwa kushiriki na kuimiliki miradi hiyo katika maeneo yao na kuhakikisha inatekelezwa kwa viwango vinavyokubalika na kupunguza maswali.

Miradi iliyokaguliwa ni  ujenzi wa madarasa 6 na matundu 12 ya vyoo katika shule ya Msingi Magomati iliyopo katika kijiji cha Usetule katika Kata ya Mahongole,ujenzi wa madarasa 3 na matundu ya vyoo 6 shule ya Msingi Ubena,Ujenzi wa nyumba pacha ya watumishi  katika zahanati ya Ikwete Katika Kata ya Lyamkena,ujenzi wa nyumba pacha ya watumishu katika zahanati ya Ngamanga katika Kata ya Utengule na nyumba pacha ya watumishi katika zahanati ya Ibatu katika Kata ya Kitandililo.