Fedha ya Umma itumike vizuri.

Tarehe iliyowekwa: April 18th, 2024

Na. Lina Sanga

Rai hiyo ilitolewa jana na Katibu Mkuu wa Chama Cha Mapinduzi  (CCM)Taifa , Ndg. Balozi Emmanuel Nchimbi katika mkutano wa hadhara uliofanyika katika uwanja wa stendi ya zamani katika Halmashauri ya Mji Makambako.

Nchimbi alisema kuwa,ipo haja kwa wananchi na viongozi wa Serikali kuwa wazalendo wa Nchi yao, kwa kufanya kazi kwa uaminifu kwa maslahi ya Umma  kwa kutoiba na Vyombo vinavyohusika kuhakikisha vinazuia wizi  kwa  kufanya upelelezi wa kutambua viashiria vya utekelezaji wa uhalifu na kuzuia kabla haujatekelezwa.

Alitoa rai kwa   wananchi  kuwa wazalendo kwa kutofanya mambo yasiyojenga Nchi , kwa kufanya kazi mahali walipo kwa uaminifu ,kwani Tanzania bado ni Nchi changa na inajengwa na watanzania wenyewe  wakiamua kwa kufanya mambo ya kuijenga Nchi badala ya kuiba na kuhujumu miradi kwa kutengeneza vitendea kazi visivyo na ubora kama kalvati isiyo na nondo.

Aidha aliitaka   TAKUKURU kuhakikisha  inafuatilia miradi mikubwa ya maendeleo tangu inapoanza hadi kukamilika, kwa kuhakikisha fedha ya Umma inatumika vizuri na hakuna fedha ya Umma inayoibiwa.

Pia , aliwataka wananchi wa Mkoa wa Njombe kuendelea kufanya kazi  kwa bidii kwa kutambua kuwa, Njombe ni moja kati ya Mikoa mitano  inayoilisha Nchi kwa miaka  zaidi ya ishirini  hivyo Chama Cha Mapinduzi  kinaendelea kuisisitiza Serikali kuendelea kuhakikisha zana za kilimo  zinapatikana kwa wakati zikiwa na ubora unaostahili na kuwakataa mazimwi wanaokula njama ya kupunguza ubora kwa maslahi binafsi.