Hundi yenye thamani ya Mil.216.7 yakabidhiwa kwa vikundi 19 vya wanawake , Vijana na watu wenye Ulemavu

Tarehe iliyowekwa: February 3rd, 2026

Na.Tanessa Lyimo

Mwenyekiti wa Halmashauri ya Mji Makambako Mhe.Salum  Mlumbe amekabidhi hundi yenye thamani ya Mil.216.7 kwa vikundi 19 vya wanawake , Vijana na watu wenye Ulemavu ikiwa ni mikopo ya asilimia kumi inayotolewa na Halmashauri ya Mji Makambako.

Mhe. Mlumbe akimwakilisha mgeni rasmi Mbunge wa Jimbo la Makambako Mhe.Daniel Geofrey Chongolo katika  hafla  iliyofanyika leo katika ukumbi wa ofisi ya Kata ya Lyamkena amewataka wanufaika kuzingatia matumizi sahihi ya fedha hizo, kama ilivyokusudiwa huku akiwasisitiza urejeshwaji wa mikopo hiyo kwa wakati ifikapo muda wa marejesho ili iweze  kuwanufaisha wakopaji wengine.

Pia, amewataka wale waliokosa mkopo wa Halmashauri kuendelea kujitokeza katika taasisi za fedha ambazo Serikali imetoa mwangaza wa mikopo yenye riba nafuu ikishirikiana na taasisi hizo ikiwa ni pamoja na Benki ya NMB.

Ametoa wito kwa watu wenye ulemavu kujitokeza kwa wingi pindi fursa za mikopo zitakapojitokeza kwani mikopo hiyo ni ya jamii yoyote lengo ikiwa ni kumnyanyua mwananchi mmoja moja  katika kukuwa na kumnufaisha  kiuchumi.

Naye Makamu Mwenyekiti wa Halmashauri na diwani wa Kata ya Mwembetogwa Mhe.Robert Hamis Shejamabu amewapongeza wanufaika kwa kujitokeza kuomba mikopo hiyo, huku akiwataka kuwa waaminifu na kutoruhusu hali ya ufatiliaji usio wa lazima pindi muda wa urejeshwaji wa mkopo utakapofika.