Kamati ya siasa Wilaya ya Njombe yaiagiza Mamlaka ya Maji Makambako kupanda miti chanzo cha maji Fukulwa.

Tarehe iliyowekwa: January 18th, 2023

Na. Lina Sanga

Kamati ya Siasa Wilaya ya Njombe imeitaka Mamlaka ya Maji Safi na Usafi wa Mazingira Mjini  Makambako (MAKUWASA) , kutenga bajeti ya upandaji miti rafiki na maji kuzunguka chanzo cha maji  Fukulwa,kilichopoKata ya  Mtwango pamoja na kuwachukulia hatua za kisheria wananchi wanaofanya shughuli za kilimo katika vyanzo vya maji pamoja na viongozi katika ngazi ya Kijiji.

Maagizo hayo yametolewa leo na Wajumbe wa Kamati hiyo,katika ziara ya ukaguzi wa utekelezaji wa Miradi ya maendeleo katika Halmashauri ya Mji Makambako na Halmashauri ya Wilaya ya Njombe.

Mhe. Nusulupila Sanga,Mwenyekiti wa Kamati ya siasa Wilaya ya Njombe amesema kuwa miundombinu ya chanzo hicho cha maji ni ya muda mrefu,hivyo ili kuzuia upotevu wa maji hasa nyakati za kiangazi,ni vema jitihada za kufanya maboresho ya miundombinu hiyo zifanyike kwa kuzingatia umuhimu wa chanzo hicho ,kwani maji hayo yanahudumia wananchi wengi  ikiwa ni pamoja na  wakazi wa Mji wa Makambako.

Akitolea ufafanuzi wa  suala la maboresho ya chanzo hicho,Meneja wa MAKUWASA,Mhandisi  Oscar Lufyagilo amebainisha kuwa bajeti yenye jumla ya Mil. 27 ya kuongeza ukuta wa mto Fukulwa imetengwa na pindi ukuta huo ukijengwa utasaidia kupunguza upotevu wa maji tofauti na  ilivyo sasa.

Mhandisi Lufyagilo amesema kuwa,ili kupunguza adha ya ukosefui wa maji katika baadhi ya maeneo ndani ya Mji wa Makambako,Mradi wenye thamani ya bil. 46 umeshaanza kutekelezwa ambapo jumla ya lita mil. 2 zitazalishwa kutoka mto Mgiwi uliopo mpakani mwa Wilaya ya Makete  na Halmashauri ya Mji Njombe na kusafiri kupitia mabomba kwa umbali wa kilomita 90 hadi Makambako.

Aidha, Kamati ya Siasa Wilaya ya Njombe imeipongeza TASAF kwa kujenga jengo la wagonjwa wa nje na huduma ya mama na mtoto pamoja na nyumba pacha za watumishi,katika kituo cha afya cha Ikelu ambacho kitasaidia wananchi kupata huduma za afya kwa gharama nafuu.

Katika ziara hiyo Kamati ya Siasa Wilaya ya Njombe imekagua miradi minne ikiwa ni  pamoja na  mradi wa madarasa matatu na ofisi moja ya kidato cha kwanza katika shule ya Sekondari Maguvani,Mradi wa barabara ya Usetule na Mbugani yenye urefu wa kilomita 12.12 kwa kiwango cha changarawe,Mradi wa maji Fukulwa na mradi wa ujenzi wa kituo cha afya Ikelu.