Kliniki ya ardhi yazinduliwa Mtaa wa Ilangamoto,nidhamu ya upangaji ardhi na utunzaji wa hati wasisitizwa

Tarehe iliyowekwa: October 13th, 2025

Na. Lina Sanga

Uzinduzi wa kliniki ya ardhi wafanyika leo katika Mtaa wa Ilangamoto,Kata ya Lyamkena kuadhimisha wiki ya huduma kwa mteja kwa kutekeleza shughuli mbalimbali zinazohusiana na sekta ya ardhi kama kugawa hati miliki kwa wananchi,kutatua kero mbalimbali,kupokea maombi ya vibali vya ujenzi sambamba na kuandaa hati miliki kwa maeneo yaliyopimwa.

Akizungumza na wananchi wa Mtaa huo Mthamini Mkuu Msaidizi Wizara ya ardhi, Dkt. Adam Nyaruhuma amewapongeza wananchi waliokabidhiwa hati na kuwataka wazitunze na kuzitumia vizuri kiuchumi na kuwasisitiza nidhamu katika matumizi sahihi ya viwanja vilivyopimwa kwa kutokatakata vipande bila kuwashirikisha wataalamu wa ardhi kwani lengo la upimaji ni pamoja na kupanga mji.

Bi. Flaviana Mamkwe, Msimamizi wa sekta ya ardhi Halmashauri ya Mji Makambako amesema kuwa Mtaa wa Ilangamoto umepangwa na kupimwa ambapo   jumla ya michoro 16 ya mipango miji imeandaliwa na  viwanja 800 vimepimwa.

Ametoa wito kwa wananchi kujitokeza kupata huduma za ardhi katika Mtaa wao ambazo zitatolewa  kwa siku tano   gharama zote zimelipwa na Wizara ya ardhi.

Bw. Geofrey Johson na Thomas Kiwale wakazi wa Mtaa wa Ilangamoto ambao leo wamekabidhiwa hati zao, wametoa rai kwa wananchi wengine kufanya taratibu za kupata hati miliki za viwanja vyao ili kuthibitisha umiliki wao na kutoishi kama wakimbizi.