Tulichokubaliana tutatekeleza, tulinde Mji wetu tusonge mbele.

Tarehe iliyowekwa: November 29th, 2025

Na. Lina Sanga

Kauli hiyo ilitolewa jana na Mbunge wa jimbo la Makambako,Mhe. Daniel Chongolo ambaye pia ni Waziri wa Kilimo wakati akizungumza na wakazi wa Kata ya Maguvani, Mjimwema na Vijana wanaojishughulisha na bodaboda na bajaji  ikiwa ni ziara yake ya kwanza tangu kuapishwa kuwa Mbunge.

Akizungumza na wafanyabiashara wa soko la maguvani, amewahakikishia wafanyabiashara hao kutekeleza ahadi ya ujenzi wa soko hilo kwa zege na nguzo za chuma kwa awamu mbili na kutoa mifuko 570 kwa ajili ya ujenzi huo ikiwa ni pamoja na choo na kizimba cha taka kwa kushirikiana na Mkurugenzi wa Halmashauri  ya Mji Makambako.

Aidha, ameahidi kutoa Mil. 20 kwa umoja wa waendesha bajaji na bodaboda kupitia akaunti zao ili kuwawezesha kupata mikopo ya bajaji na bodaboda na kuondokana na adha ya mikopo umiza na mikataba kandamizi, pamoja na kugharamia  bima za Afya na darasa la udereva kwa vijana takribani 407 ,bodaboda 164,bajaji 193 na mafundi gereji 50 na kuahidi kuwasaidia vijana ambao ni waraibu wa dawa za kulevya.

Ametoa wito kwa wananchi wa Makambako kulinda Mji wao kwa wivu na kutokubali kushawishiwa kufanya uharibifu ambao utasababisha kudolola kwa uchumi  wa Mji na Taifa kwa ujumla.