Maadhimisho ya siku ya kumbukumbu ya Mashujaa,Halmashauri ya Mji Makambako.

Tarehe iliyowekwa: July 26th, 2023

Na. Lina Sanga

Jana Julai 25,2023  ikiwa ni   siku ya kumbukumbu ya Mashujaa,Halmashauri ya Mji Makambako ilifanya maadhimisho hayo ,katika baadhi ya   shule  za sekondari na msingi  ili kuwajengea uelewa wanafunzi juu ya umuhimu wa siku hiyo na umuhimu wa uzalendo kwa maslahi ya jamii na taifa kwa ujumla.

Afisa  Michezo wa Halmashauri ya Mji Makambako ,Taifa  Lumato akizungumza na wanafunzi hao na kuelezea  historia fupi ya mashujaa nchini  na umuhimu wao,alitoa wito kwa wanafunzi na wananchi wote nchini,kutambua umuhimu wa maadhimisho ya siku ya mashujaa na  kuwaenzi kwa kazi kubwa waliyoifanya ya kuikomboa nchi yetu  na kuiweka  salama, hivyo kila mtu yampasa   kuwa mzalendo na kujitoa kwa ajili ya taifa.

Ametoa wito kwa walimu wa masomo ya historia na uraia kuendelea kutoa Elimu juu ya historia ya mashujaa, ili  kuwajengea wanafunzi hao moyo wa uzalendo na kujitoa kwa ajili ya nchi yao  kwani ndio taifa la kesho.

Naye,Afisa utamaduni wa Halmashauri ya Mji Makambako, Ester Mwakalindile ,alisema kuwa maadhimisho ya siku ya mashujaa yanayofanyika julai 25,kila mwaka kwa lengo la  kukumbushana historia  ya mashujaa , waliojitoa kwa ajili ya taifa pasipo kujali uhai wao ,kwa maslahi ya taifa lote kwa kutanguliza uzalendo mbele kwani bila uzalendo nchi  ingevamiwa  na  kuendelea kutawaliwa.

Maadhimisho hayo yalifanyika katika  shule ya sekondari Makambako , Deo Sanga , shule ya msingi Mashujaa   na Azimio, kwa kuimba nyimbo za kizalendo , kufanya usafi wa mazingira na  kumwagilia miti ili kuwaenzi mashujaa hao akiwemo hayati Mwl.Julius Kambarage Nyerere aliyepigania uhuru wa Tanganyika.