Mbolea ya ruzuku ianze kutolewa agosti 15,2022-Mhe. Samia

Tarehe iliyowekwa: August 8th, 2022

Na. Lina Sanga

Mbeya

Rais wa Jamhuri ya Muungano wa Tanzania,Mhe. Samia Suluhu Hassan ameiagiza Wizara ya Kilimo,kuhakikisha  mbolea ya ruzuku inaanza kutolewa agosti 15 ili kuwawezesha wakulima kulima kwa wakati kulingana na msimu.

Mhe. Samia ametoa agizo hilo leo katika kilele cha maonyesho ya nanenane kwa mwaka 2022,yaliyofanyika kitaifa katika viwanja vya John Mwakangale jijini Mbeya,baada ya kuwasilishwa kwa taarifa ya utekelezaji wa mbolea ya ruzuku iliyowasilishwa na Waziri wa Kilimo,Mhe. Hussein Bashe.

Pia amezitaka kampuni zote  zinazosambaza mbolea ya ruzuku,kutangaza mawakala wake ambao wanauza mbolea yenye ruzuku ili wakulima wajue.

Ametoa Wito kwa  wakulima wote kujisajili ili waweze kupata mbolea ya ruzuku,na siku za mbeleni vitambulisho vya wakulima vitatolewa ili kuwawezesha wakulima kupata ruzuku mbalimbali na mikopo katika taasisi za kifedha.

Aidha,ameongeza  kuwa Serikali imejipanga kuwagawia mashamba yenye hatimiliki  vijana,ili kuwawezesha  kujiajiri  kupitia sekta ya kilimo lakini pia kuwawezesha kupata mikopo kwenye taasisi za kifedha na kuagiza Kila mkoa  kutenga maeneo makubwa kwa ajili ya kilimo cha mashamba makubwa na sio vipande vipande.

Pia Mhe. Samia Suluhu Hassan amekabidhi funguo za trekta kwa wakulima bora  wawili  na  ameshuhudia utiaji saini mikataba  21 ya miradi ya Kilimo yenye thamani ya zaidi ya bil. 180 itayotekelezwa kwenye Mikoa 7,Wilaya 12, yenye ukubwa wa hekta 26,700  na miradi hiyo ikikamilika jumla ya  ajira mpya zaidi ya laki moja  zitaongezeka na kuongeza uzalishaji wa zaidi ya tani 97,000 za mpunga.