NJOMBE TUNAHITAJI VYUO VYA UFUNDI VYA KATI ILI VIJANA WAJIENDELEZE - Mhe. Justine Nusulupila Sanga Mwenyekiti CCM Wilaya ya Njombe

Tarehe iliyowekwa: November 7th, 2022

Na. Lina Sanga

Njombe

Mwenyekiti wa Chama Cha Mapinduzi Wilaya ya Njombe, Mhe. Justine Nusulupila Sanga amesema kuwa ipo haja ya Mkoa wa Njombe kuwa na vyuo vya ufundi vya kati (VETA) ili kuwawezesha vijana kujifunza utaalamu mbalimbali kwa kushirikiana na SIDO.

Mhe. Sanga ametoa rai hiyo leo katika Kikao kazi cha Mkuu wa Mkoa na Wahe. Madiwani wa Halmashauri zote za Wilaya ya Njombe,Wakurugenzi,Wakuu wa idara na Vitengo, Watendaji wa Kata,Mitaa na Vijiji  wa Halmashauri zilizopo Wilaya ya Njombe.

Amesema kuwa licha ya Maombi ya Viongozi mbalimbali ya Mkoa wa Njombe kuwa na Chuo kikuu ipo haja ya kuanza na vyuo vya kati vya ufundi wakati wa suala la chuo kikuu likiendelea kuchakatwa ili kuwapa nafasi vijana wenye ujuzi mbalimbali kupata nafasi ya kujifunza zaidi utaalamu wa  ufundi  mbalimbali ili waweze kujiajiri na kujiingizia kipato.

Aidha amesema kuwa kuanzia sasa hategemei kupata malalamiko mbalimbali kutoka kwa Wenyeviti wa Mitaa na Vijiji kama malipo ya posho na stahiki zao mbalimbali kwani ni haki zao na kumuahidi Mkuu wa Mkoa kuwa atafuatilia utekelezaji wa masuala mbalimbali yaliyozungumzwa kwenye kikao hicho.