Rais Samia aupongeza Mkoa wa Njombe kwa kukusanya mapato vizuri kwa mwaka 2021/2022

Tarehe iliyowekwa: August 10th, 2022

Na. Lina Sanga

Njombe

Rais wa Jamhuri ya Muungano wa Tanzania,Mhe. Samia Suluhu Hassan ameupongeza Mkoa wa Njombe kwa ukusanyaji Mzuri wa mapato kwa mwaka wa fedha 2021/2022 na, kuwapongeza Wakurugenzi kwa kazi nzuri waliyoifanya  na kuwataka kuendelea kuongeza juhudi katika ukusanyaji aa mapato ili kufanikisha utekelezaji wa  miradi ya maendeleo. 

Mhe. Samia ametoa pongezi hizo leo alipokuwa akihutubia wananchi wa Mkoa wa Njombe leo,katika Viwanja vya sabasaba ikiwa ni sehemu ya ziara yake ya siku tatu mkoani Njombe.

Kuhusu ombi la Viongozi la Mkoa wa Njombe kupandishwa hadhi kuwa Manispaa,Mhe. Samia amesema kuwa kutokana na hali ya uchumi kwa sasa ugawaji wa maeneo mapya  ya  kiutawala au kupandisha hadhi,umezuiliwa na muelekeo ni kwa wananchi,mapinduzi ya kilimo na  kunyanyua hali ya uchumi kabla ya kugawanya maeneo ya utawala.

Ameongeza kuwa kuhusu ombi la  ujenzi wa chuo kikuu katika Mkoa wa Njombe, kuna mradi wa ujenzi wa vyuo vikuu ambao unaruhusu vyuo kuweka matawi katika Mikoa,hivyo endapo kuna nafasi ya ujenzi wa chuo kikuu chochote,tawi litajengwa Njombe na endapo mradi umebana ameahidi kulifanyia  kazi kwa wakati mwingine ili kupitia mradi huo tawi la chuo kikuu lijengwe  Mkoani Njombe.

Pia, amesema kuwa kujenga mazingira ya kuwezesha kukuza uchumi kwa mtu mmoja mmoja na nchi kwa ujumla,miradi na mazingira ya uwekezaji inayowekwa  Viongozi wa Mikoa na Wilaya nchini ,hawana budi kubeba na kutekeleza kwa moyo mkunjufu kwani miradi mingine hujenga fursa za watanzania kufanya miradi na  shughuli zao za maendeleo,kujipatia kipato na kulipandisha taifa kwani  kujenga uchumi wa taifa unaanza chini kwa uchumi wa mtu mmoja mmoja.

Ametoa wito kwa Viongozi na wananchi kuchapa kazi, kwani mazingira yanayojengwa  na ruzuku zinazotolewa ni kwa ajili ya  kufanya kazi na kuzalisha kwa tija na kwa wingi,na kuuza kwa wingi ili kupata mapato ya kutosha na kujenga taifa.

Kuhusu utawala bora,Mhe. Samia suluhu ametoa rai kwa viongozi wote kuanzia ngazi ya chini hadi Mkoa kuhudumia na kutumikia wananchi,kwani viongozi sio watawala bali  wahudumu.

"Niwaombeni twendeni tukahudumie wananchi tumewekwa na Mungu ametuteuwa tuwahudumie wananchi kwa utawala bora,kama umebahatika kukaa hapo ulipokaa mwananchi akija muhudumie vizuri kwani wananchi hawana shida,tunapowaomba kura tunatoa ahadi nyingi sana tunapopata kura tunawageuka, twende tuwahudumie wananchi",amesema Mhe. Samia.

Mwisho ametoa wito kwa watanzania wote kujitokeza kuhesabiwa katika zoezi la Sensa ya watu na Makazi, inayotarajiwa kuanza agosti 23, mwaka huu kwa mipango endelevu ya nchi.