Sitafurahia ujinga wa kufedhehesha watumishi wa Serikali ndani ya Mkoa wa Njombe.

Tarehe iliyowekwa: September 12th, 2022

Na. Lina Sanga

Mkuu wa Mkoa wa Njombe,Mhe. Anthony Mtaka ametoa kauli hiyo leo baada ya kusikiliza kero na changamoto wanazopitia walimu,pindi wanapohitaji huduma katika ofisi za Halmashauri hasa idara ya utumishi.

Mhe. Mtaka amesema kuwa ipo haja ya kufanya vikao pamoja timu ya menejimenti na watumishi katika Halmashauri zote za Mkoa wa Njombe,ili kuhakikisha kila Mkuu wa idara anawajibika kwa nafasi yake pamoja na uimara wa timu ya menejimenti wa kushughulikia masuala ya utumishi.

Amesema kuwa timu ya menejimenti inabeba dhamana ya watumishi ndiyo maana Mkurugenzi wa Halmashauri ni Muajiri na vitambulisho vya watumishi vina muhuri wake na kikao na watumishi wa idara ya utumishi kitafanyika kuwekana sawa.

"Tutafanya kikao na watu wa utumishi kuwekana sawa,niwahakikishie  walimu hayo ni masuala madogo sana,kwa sababu mimi naamini ili tuweze kufanikiwa kwenye agenda tunazokubaliana ni lazima  manung'uniko yaliyo ndani ya uwezo wetu tuweze kuondokana nayo",amesema Mhe. Mtaka.

Ametoa rai kwa watumishi wa idara ya utumishi kushughulikia masuala mbalimbali ya watumishi,kwani nafasi hizo sio za kudumu endapo mtumishi anatakiwa kupandishwa daraja hawana budi kumpandisha kwani fedha sio zao.