Stoo zilizopo kwenye makazi ya watu zinatakiwa kuhamia soko la mazao Kiumba na sio biashara ya mazao inayofanyika katika soko kuu.

Tarehe iliyowekwa: December 4th, 2023

Na. Lina Sanga

Tamko hilo limetolewa leo na Afisa Biashara,Viwanda na Uwekezaji wa Halmashauri ya Mji Makambako,Bw. Carlos Mhenga katika kikao na baadhi ya Viongozi wa wafanyabiashara wa mazao katika Mji wa Makambako.

Mhenga, alitoa tamko hilo mara baada ya kupokea malalamiko ya baadhi ya wafanyabiashara wa mazao ambao bado hawajahamisha stoo zao zilizopo katika makazi ya watu,pembezoni mwa soko kuu la Makambako kwa madai ya kutokuhama endapo wauza mazao waliopo soko kuu hawatabaki.

Mhenga,amesema kuwa wafanyabiashara wa mazao katika soko kuu la Makambako wapo kihalali ,kwani soko hilo linatoa huduma ya bidhaa mchanganyiko ikiwa ni pamoja na nafaka ambazo hazizidi gunia tano,na wafanyabiashara hao hawatibu mazao yaliyopo sokoni bali yaliyopo stoo,ambazo zilikuwa katika makazi ya watu na walishapewa maeneo ya kujenga stoo katika  soko la Kiumba.

Naye Mkuu wa upelelezi wa makosa ya jinai Kituo cha polisi Makambako,OCCID Gotfrid Kimboy ,kwa niaba ya Mkuu wa polisi Wilaya ya Kipolisi Makambako,amewataka wafanyabiashara hao kutii agizo kwani mpaka Serikali  imeratibu ujenzi wa soko hilo ushirikishwaji ulikuwepo,na jeshi la polisi lipo kusimamia utekelezaji wa kazi na maagizo ya Serikali.