Viongozi wa Vikundi vya Wanawake na Vijana tunzeni uaminifu wenu.

Tarehe iliyowekwa: January 23rd, 2023

Na. Lina Sanga

Rai hiyo imetolewa na Afisa Maendeleo ya jamii Halmashauri ya Mji Makambako,Kassim Mamba katika Mafunzo ya kabla ya Mkopo yaliyofanyika katika ukumbi wa Halmashauri ya Mji Makambako leo.

Bw. Kassim amesema kuwa, baadhi ya viongozi wa vikundi wamekuwa na tabia ya kutowajulisha wana kikundi wengine kuhusu  fedha ya mkopo waliyoomba kuingizwa kwenye akaunti ya kikundi, na kudiriki kugawana mikopo hiyo wenyewe na kuibua malalamiko kwa  wana kikundi dhidi ya Halmashauri kutowapatia mkopo.

Amesema kuwa, ipo haja ya viongozi kujitahidi kuwa  waaminifu kwa  wanavikundi wote, ili kila mmoja anufaike na mkopo kama maombi yalivyowasilishwa na kuhakikisha marejesho yanafanyika kwa wakati ili vikundi vingine vinufaike pia.

Awali akifungua mafunzo hayo Kaimu Mkurugenzi wa Halmashauri ya Mji Makambako, Bi. Appia Mayemba amewataka wanufaika wote wa mikopo kutumia fedha hizo kufanikisha malengo waliyokusudia ili waweze kupata faida na kurejesha mikopo kwa wakati badala ya kutumia katika vitu ambavyo haviwezi kuzalisha chochote.

Katika mafunzo hayo wanufaika wa mkopo wa asilimia 10 wamepata fursa ya kujifunza masuala mbalimbali ikiwa ni pamoja na masuala ya kilimo,ufugaji,lishe,afya,biashara,viwanda na uwekezaji pamoja na elimu ya fedha iliyowasilishwa na afisa mauzo wa benki ya NMB,Winfrida Mghamba.

Jumla ya Mil. 76 zimetolewa wanufaika wa mkopo wa asilimia 10 , ambapo jumla ya vikundi vya Wanawake 9, Vijana 3 na watu wenye ulemavu 8 wamepata mikopo katika kipindi cha robo ya pili katika mwaka wa fedha 2022/2023.