Viwanja 1,191 Mtaa wa Sekondari,Kata ya Maguvani vimerasimishwa kupitia mradi wa MKURABITA

Tarehe iliyowekwa: August 17th, 2022

Na. Lina Sanga

Serikali kupitia  Mpango wa Kurasimisha  Rasilimali na Biashara za wanyonge Tanzania (MKURABITA), inaweka miundombinu kwa kuhakikisha kiwanja,shamba na biashara za wananchi zinarasimishwa ili kuwasaidia wananchi kutambuliwa na taasisi za fedha kwa kupata mikopo kwa ajili ya kutimiza malengo yao kiuchumi.

Kauli hiyo imetolewa na Mratibu wa MKURABITA taifa,Dr. Seraphia Mghembe katika mkutano wa uzinduzi wa utoaji hatimiliki kwa wananchi wa Mtaa wa Sekondari, uliofanyika leo Maguvani kijiweni.

Mghembe amesema kuwa,Rais wa awamu ya tatu wa Tanzania,hayati William Mkapa alianzisha Mpango wa Kurasimisha  Rasilimali na Biashara za wanyonge Tanzania,kwa lengo la kuhakikisha watanzania wote wanamiliki rasilimali zinazotambulika kisheria,zina nguvu ya kukuza mitaji na wanaofanya biashara wanafanya biashara zinazokuwa na kuongeza vipato vyao.

Amesema kuwa,MKURABITA kwa mwaka wa fedha 2021/2022 walikuwa na mpango wa kurasimisha viwanja 1000 katika mitaa miwili iliyopo katika Halmashauri ya Mji Makambako,Mtaa wa Kikula katika Kata ya Makambako na Mtaa wa Sekondari,Kata ya Maguvani lakini hadi sasa zoezi la urasimishaji kupitia MKURABITA limefanyika mtaa mmoja baada ya mwitikio mkubwa wa wananchi tofauti na matarajio yaliyokuwepo.

Ameongeza kuwa, hadi sasa jumla ya viwanja 1,191 sawa na asilimia 119 ya lengo vimepimwa katika Mtaa wa Sekondari ,851 walipewa Ankara ya kulipia hatimiliki na 434 pekee wamefanya malipo na watakabidhiwa hati za viwanja.  

Ametoa wito kwa wananchi ambao wamepimiwa ardhi wajitokeze kuchukua Ankara na kufanya malipo,kwa ajili ya ukamilishaji wa zoezi la urasimishaji wa ardhi zao kwa  kuandaa hatimiliki za viwanja.