Wadau wa elimu anzisheni vituo vya elimu maalum.

Tarehe iliyowekwa: September 8th, 2022

Na. Lina Sanga

Wito umetolewa kwa wadau wa elimu wenye uwezo wa kuanzisha vituo vya kutolea elimu kwa watoto waliokosa elimu,katika mfumo rasmi MEMKWA kwani idadi ya wahitaji wa elimu hiyo na vituo vilivyopo havitoshelezi.

Wito huo umetolewa leo na Kaimu mthibiti ubora Halmashauri ya Mji Makambako Vitalis Genda, katika maadhimisho ya wiki la elimu ya watu wazima yaliyofanyika katika viwanja vya shule ya Msingi Kahawa.

Genda amesema kuwa elimu ya MEMKWA ni muhimu sana kwani inapunguza idadi ya watoto na watu wazima wasiojua kusoma na kuandika,hivyo kwa wadau wa elimu wenye uwezo wa  kuanzisha vituo hivyo waanzishe ili kushirikiana na Serikali kupunguza idadi ya watu wasiojua Kusoma na kuandika nchini.

Aidha,amewataka watu wazima wasiojua kusoma na kuandika kujitokeza na kujiunga mafunzo ya MEMKWA,kwani elimu hiyo ina manufaa makubwa kwa maendeleo yao.

Katika maadhimisho hayo zana mbalimbali za kufundishia na  kujifunzia watoto wenye mahitaji Maalumu,zilionyeshwa kama zana za kujifunzia watoto wenye uoni hafifu na wasio ona kabisa,viziwi na watoto wenye ulemavu lakini pia maonyesho mbalimbali ya watoto hao yalionyesha kudhihirisha mafanikio ya elimu jumuishi.