Wakurugenzi wa mamlaka za Maji toeni maji kama huduma acheni kuwabambikia wananchi bili za maji

Tarehe iliyowekwa: August 10th, 2022

Na. Lina Sanga

Njombe

Agizo hilo limetolewa na Waziri wa Maji,Mhe. Jumaa Aweso alipokuwa akitoa salamu kwa Mhe. Samia Suluhu Hassan Katika Mkutano wa  hadhara uliofanyika leo Mkoani Njombe.

Mhe. Aweso amesema kuwa huduma ya maji sio biashara bali ni huduma,hivyo Wakurugenzi wa Mamlaka za Maji watoe Maji kwa maana ya  huduma na sio kuwabambikizia wananchi bili za maji,kwani maji ni usalama  wa taifa  ukiwa na maji toshelezi uhakika wa usalama wa chakula,nishati na usalama wa ndoa unakuwepo,Wizara ya Maji itahakikisha usalama wa ndoa za kina Mama.

Mhe. Aweso amesema kuwa miaka ya nyuma  Serikali iliwekeza fedha nyingi kwa ajili ya ujenzi wa Miradi ya Maji lakini matokeo hakuna na ilionekana ni kawaida,lakini pia  wananchi wanaoishi vijijini kukosa maji na kunywa maji pamoja na mifugo ilionekana ni kawaida,lakini sasa miradi mikubwa ya maji imejengwa hadi vijijini na Wizara ya Maji iliyokuwa ni Wizara ya Kero na lawama hivi  sasa imekuwa Wizara ya utatuzi.

Ameongeza kuwa Wizara ya maji haijaajiri vibaka kutekeleza miradi ya maji,bali imeajiri wataalamu ili kuhakikisha watanzania wote wanapata maji safi na salama.

"Mhe. Rais tukuhakikishie Wizara Ya Maji haijaajiri vibaka,Wizara imeajiri wataalamu tutahakikisha  watanzania wanaoishi Mijijini na Vijijini wanapata maji safi na salama",alisema Mhe. Aweso.

Pia,amesema kuwa moja ya changamoto kubwa ni miradi kichefuchefu katika taifa, ambapo jumla ya miradi 177 iliainishwa na baada ya kuanzishwa kwa Wakala wa Maji Vijijini (RUWASA) jumla ya miradi 130 imeshakwamuliwa hadi kufikia  mwezi disemba miradi yote  itakamilishwa.

Mhe. Aweso amesema kuwa Wizara ya Maji imejipanga vizuri  kuendelea  kuwatua kina mama ndoo kichwani kwa kujenga miradi mikubwa ya Maji Njombe Mjini,Makambako na Wanging'ombe.