Walimu wakuu wa shule za awali na msingi kujengewa uwezo wa ufundishaji kwa vitendo mtaala mpya wa elimu

Tarehe iliyowekwa: January 6th, 2025

Na. Tanessa Lyimo

Walimu wakuu wa shule za awali na msingi 17 katika Halmashauri ya Mji Makambako, wanatarajia kupewa semina ya mafunzo kwa ajili ya kujengewa uwezo wa  kufundisha kwa vitendo mtaala mpya wa elimu ya awali na msingi ambao nao watawafundisha walimu wengine katika shule 57 za awali na msingi ndani ya Halmashauri ya Mji Makambako.

Hayo yameelezwa na  mwezeshaji kitaifa kutoka Ofisi ya Rais,Tawala za Mikoa na Serikali za Mitaa (OR - TAMISEMI),Mwl. Jerome Mwakifuna wakati wa semina ya mafunzo ya kuwajengea uwezo wa kufundisha kwa vitendo mtaala mpya wa elimu ya awali na msingi timu ya uwezeshaji ngazi ya Halmashauri, iliyofanyika leo katika ukumbi wa shule ya Msingi Sigrid.

Mwl. Mwakifuna  amesema kuwa,  mafunzo hayo yatasaidia kuwajengea uwezo walimu  ili waweze kufundisha kutoka kwenye mfumo wa nadharia na kuweza kufundisha  kwa vitendo ili waendane na kasi na mahitaji ya dunia ya sasa yenye ushindani.

Kwa upande wake afisa elimu taaluma divisheni ya elimu ya awali na Msingi katika Halmashauri ya Mji Makambako, Mwl. Shaban Ambindwile amesema kuwa, mafunzo hayo yatawasaidia walimu pamoja na wanafunzi wanaokwenda kutumia  mfumo mpya wa Mtaala  kuanzia elimu ya awali Mpaka darasa la sita na  Halmashauri ya Mji Makambako imejipanga  vyema kuhakikisha mafunzo hayo yanawafikia walimu wote baada ya semina  hiyo kukamilika.

Naye, Mwl. Furaha Mgeni, kutoka shule ya msingi Lungwa ambaye ni mmoja kati ya  timu ya uwezeshaji ngazi ya Halmashauri amesema mafunzo hayo ni muhimu kwao, katika kuwajengea uwezo wa kuandaa Zana mbalimbali za kufundishia  hasa kwa ngazi ya awali, na kuwataka walimu wote kuyapokea mafunzo hayo  ili yawasaidie katika ufundishaji.