Wananchi waishauri Serikali kuongeza Polisi Kata kukabiliana na uhalifu,TANESCO Makambako yaahidi kukamilisha mradi wa umeme nyumba 400 Kilimahewa.

Tarehe iliyowekwa: August 16th, 2023

Na. Lina Sanga

Wananchi wameishauri Serikali kuongeza idadi ya polisi Kata, katika kila  Kata nchini  hasa  zenye idadi kubwa ya watu, ili kuimarisha ulinzi na usalama wa raia.

Ushauri huo ulitolewa jana na  wananchi wa Mtaa wa Majengo, katika  ziara ya mbunge wa jimbo la Makambako, Mhe. Deo Kasenyenda Sanga katika Kata ya Majengo.

Imeelezwa kuwa,matukio ya ukatili wa kijinsia yamekuwa yakitendeka kama ubakaji wa wanawake wazee,na ni ngumu kwa askari Kata mmoja  kufika kwa wakati eneo la tukio kwani Kata ni kubwa sana.

Naye, Mwenyekiti wa Mtaa wa Kilimahewa,Antony Ngollo ameliomba Shirika la Umeme nchini (TANESCO), kukamilisha uwekaji wa   huduma ya umeme kwa takribani nyumba 400 zilizokosa huduma hiyo katika Mtaa wa Kilimahewa  ili wananchi hao wanufaike na huduma hiyo.

Mhe. Deo Sanga,Mbunge wa jimbo la Makambako ametoa ahadi kwa wakazi waliokosa umeme katika Mtaa wa Kilimahewa kuwa atalishughulikia kwa kushirikiana na Meneja wa TANESCO Makambako ili vifaa vinavyohitajika kukamilisha mradi huo vipatikane na wananchi wapate huduma ya Umeme.

Kaimu Meneja wa TANESCO Makambako,Ezekia Sambala amesema kuwa wakati wa utekelezaji wa mradi Mtaa wa Kilimahewa mwaka wa fedha 2022/2023 mradi ulishindwa kukamilika kutokana na ukosefu wa vifaa ambavyo vinatarajiwa kununuliwa katika mwaka huu  wa fedha 2023/2024.